По денешното соопштение на ФК Шкендија, во кое клубот ја критикуваше судиската пракса во Првата македонска фудбалска лига, Фудбалска федерација на Македонија реагираше со експресен и директен одговор. Федерацијата ги нарече обвинувањата „добро познат метод за барање алиби“ секогаш кога резултатите не одат во корист на тетовскиот тим.
Од ФФМ истакнуваат дека бројките зборуваат поинаку: според статистиката, Шкендија оваа сезона е еден од најзаштитените клубови, без сериозни судиски одлуки против нив. За споредба, минатата сезона токму на нив им помогнаа контроверзни одлуки во мечот со Тиквеш, што го донесе пласманот до титулата, без никакви реакции од Тетово.
Федерацијата укажува и на селективниот пристап на клубот: кога Шкендија пред десетина дена победи во последните моменти во Кратово или во минатото коло против Вардар, немаше никаков проблем со судиите, што ја потврдува тезата дека критиката е изборна, а не принципиелна.
ФФМ директно ги прозива раководителите на Шкендија, Љуљзим Имери и Бесник Ибраими, обвинувајќи ги дека повеќе се грижат за туѓи интереси отколку за сопствениот клуб. Федерацијата не ги заборави ниту инцидентите на теренот, кога судиите беа гаѓани со метални предмети и запалки, прашувајќи зошто клубот тогаш не покажал „загриженост за интегритетот на фудбалот“.
Во однос на најавата на Шкендија за жалба до УЕФА, ФФМ одговори со доза иронија и подготвеност за соработка: „Слободно обратете се до УЕФА. Ние ќе ја обезбедиме целата видео-анализа и статистика, па нека види Европа колку навистина е „оштетена“ Шкендија.“
Од федерацијата јасно порачаа дека нема да подлегнат на притисоци и обиди за создавање теории на заговор. „Нема недопирливи, правилата важат еднакво за сите, а секој инцидент ќе биде санкциониран без исклучок“, стои во соопштението.
Посебен апел ФФМ упатува до Шкендија, кој е поддржан од сериозен инвеститор како „Еколог“: клубот треба да покаже одговорно раководење, а не ароганција и „поглед од горе“ кон ривалите.
По 22 кола, трката за титулата во Првата македонска фудбалска лига останува тесна. Вардар води со 55 бодови, додека Шкендија следи со 52, што ветува неизвесен финиш на сезоната.
