Премиерот Христијан Мицкоски порача дека во овој момент нема основа за воведување кризна состојба, иако глобалните економски турбуленции предизвикани од конфликтите на Блискиот Исток ја зголемија цената на енергенсите на светските пазари. Според него, Владата внимателно ја следи ситуацијата и засега нема индикации дека земјата се соочува со недостиг на гориво.
Тој истакна дека Македонија и понатаму има едни од најниските цени на нафтените деривати во регионот, што создава дополнителен притисок врз бензинските станици, особено во пограничните области. Таму, според информациите од институциите, зачестено доаѓаат возачи од соседните земји за да наполнат гориво по пониски цени.
Мицкоски уверува дека инспекциските служби се постојано на терен и дека снабдувањето е стабилно. Како што посочи, поголем притисок е очекуван во западните делови од државата, бидејќи горивото е поскапо во Србија, додека во Косово цените значително варираат. И покрај тоа, надлежните институции тврдат дека резерви има доволно, а разговори се водат и со дистрибутерите и нафтените компании за да се гарантира непречено снабдување. Дополнително, владините анализи покажуваат дека цените на енергенсите на светските берзи во последниот период бележат тренд на намалување.
Во меѓувреме, Владата планира да ја прошири контролата и врз малопродажниот сектор на храна. Премиерот најави средби со трговските синџири со цел да се спречи евентуално неоправдано покачување на цените. Според него, институциите нема да дозволат шпекулации на пазарот и се подготвени да реагираат со посериозни мерки доколку се појават злоупотреби. Во тој контекст, засилен мониторинг ќе спроведува и Државниот пазарен инспекторат.
Иако во последните денови горивата поскапеа, нивото на цените во земјава сè уште е пониско од повеќето држави во регионот. Од 10 март, бензинот Еуросупер БС-95 се продава по околу 79,5 денари за литар (1,289 евра), додека дизелот чини 85,5 денари (1,386 евра). За споредба, цените се повисоки во соседните пазари. Во Бугарија бензинот достигнува околу 1,34 евра, а дизелот 1,44 евра; во Србија тие се движат околу 1,52 и 1,68 евра. Уште повисоки се во Грција, каде бензинот надминува 1,81 евро, додека дизелот е близу 1,70 евра. Во Хрватска, пак, бензинот чини околу 1,51 евро, а дизелот 1,55 евра.
Од инспекциските служби информираат дека контролите на бензинските пумпи се засилени. Директорот на Државниот пазарен инспекторат, Влатко Стојкоски, соопшти дека се спроведени повеќе од 300 надзори. Кај над 30 пумпи било утврдено дека привремено ги исцрпиле залихите, но по нивното дополнување веднаш продолжиле со редовна работа. Контролите ќе продолжат и во секторот за трговија со храна, кај маркетите, дистрибутерите и увозниците.
Министерот за економија и труд, Бесар Дурмиши, предупредува дека развојот на кризата во голема мера ќе зависи од времетраењето на конфликтот на Блискиот Исток. Ако ситуацијата се смири брзо, пазарите би можеле релативно брзо да се стабилизираат. Но доколку кризата потрае, Владата најавува подготвеност за интервенција. Меѓу опциите што се разгледуваат се ограничување на трговските маржи, на 10 и 5 проценти, а во случај на подлабоки пазарни нарушувања можно е и замрзнување на цените на основните прехранбени производи.
