Воените судири на Блискиот Исток во моментов носат едно јасно „добро“ за трета страна, Русија. Ова го истакна претседателот на Европскиот совет, Антонио Коста, кој во говор пред амбасадорите на ЕУ во Брисел оцени дека конфликтот создава финансиски и стратешки придобивки за Москва, додека украинската криза добива помалку внимание.
„Единствениот победник досега е Русија“, рече Коста, објаснувајќи дека порастот на цените на енергијата директно ја полни касата на Москва, овозможувајќи ѝ да продолжи со воените операции во Украина. Дополнително, сегашниот конфликт го одвлекува вниманието и ресурсите што би можеле да се користат за поддршка на Киев.
Претседателот на Европскиот совет предупреди дека меѓународниот поредок, кој се заснова на правила и права, е под силен притисок. „Слободата и човековите права не се освојуваат со бомби, тие се гаранција на законот“, порача Коста, нагласувајќи ја потребата од итен повраток на страните на Блискиот Исток на преговарачката маса за да се избегне понатамошна ескалација.
Според него, последиците од конфликтот не остануваат ограничени само на регионот. Тие претставуваат ризик за стабилноста на Европа и глобалната безбедност.
