Британскиот „Телеграф“ откри дека Моџтаба Хамнеи, кој неодамна го презеде врховното владеење во Иран по смртта на неговиот татко, ајатолах Али Хамнеи, е сопственик на два раскошни апартмани во престижното кенсингтонско подрачје во Лондон, лоцирани на само неколку десетици метри од израелската амбасада.
Според истражувањето на весникот, имотите во Кенсингтон Палас Гарденс биле купени преку посредништво во 2014 и 2016 година, со вкупна цена над 48 милиони американски долари. Денешната пазарна процена на двата стана е околу 67,4 милиони долари. Во центарoт на оваа „финансиска конструкција“ е иранскиот банкар и бизнисмен Али Ансари, кој се наоѓа под санкции на Велика Британија и САД поради наводно финансирање на Корпусот на исламската револуционерна гарда.
Експертите за безбедност предупредуваат дека близината на овие станови до израелскиот дипломатски комплекс претставува сериозен ризик – потенцијална платформа за набљудување или други облици на надзор.
Иранските државни медиуми потврдија во неделата дека Моџтаба Хамнеи официјално е именуван за врховен лидер, откако неговиот татко го загуби животот на 28 февруари во воздушен напад врз Техеран, за кој иранските власти ја обвинија коалицијата на САД и Израел, настан што ја иницираше регионалната криза.
Покрај луксузните станови, истражувањето на „Блумберг“ покажа дека новиот ирански врховен лидер има значителен имотен портфолио во странство вреден околу 138 милиони долари. Во него се вклучени престижни недвижности како куќа на „Булеварот на милијардерите“, вила во Дубаи и луксузни хотели во различни европски дестинации, најчесто стекнати и управувани преку истите посредни финансиски канали, со средства поврзани со приходите од иранската нафтена индустрија.
