По шест години прекин, Кина и Северна Кореја повторно го отвораат директното железничко поврзување меѓу Пекинг и Пјонгјанг, што се гледа како јасен знак за затоплување на билатералните односи, јавува ДПА.
Според соопштението на кинеската државна железница, првиот патнички воз ќе тргне во четврток, со патување кое ќе трае околу 24 часа. Линијата беше прекината во 2020 година, кога Пјонгјанг затвори граници заради пандемијата на Ковид-19.
China Railway истакнува дека повторното воспоставување на железничката врска ќе ги зајакне економските и културните врски меѓу двете земји. Возовите ќе сообраќаат четири пати неделно во двете насоки, при што два вагона ќе бидат резервирани за странски патници.
Кинеските туристи беа најбројната група посетители во Северна Кореја , пред ковид пандемијата. Исто така, Пекинг останува еден од клучните економски партнери на Пјонгјанг, додека земјата се соочува со опсежни санкции на Обединетите нации поради својата нуклеарна програма и сериозните прекршувања на човековите права.
Последен пат кога севернокорејскиот лидер, Ким Џонг-ун, го посети Пекинг, беше во септември минатата година за да присуствува на воената парада на Народноослободителната армија на Кина, што беше едно од ретките негови патувања надвор од државата.
