Иранската армија соопшти дека извршила напад врз повеќе израелски воени цели, меѓу кои и објекти поврзани со израелската безбедносна инфраструктура. Според соопштението, мета на операцијата биле воздухопловните бази Палмахим и Овда, како и седиштето на израелската контраразузнавачка служба Шин Бет. Нападите, како што тврдат иранските власти, биле изведени со беспилотни летала, а информацијата беше објавена преку државната телевизија во Техеран.
Во меѓувреме, утринава во Ерусалим одекнале експлозии, додека израелската армија информираше дека кон земјата биле испукани ирански ракети. Поради опасноста, низ повеќе делови од Израел се огласиле сирените за воздушна тревога.
Израелските власти наведуваат дека поголемиот дел од проектилите биле пресретнати од системите за противвоздушна одбрана. Сепак, остатоците од уништените ракети често паѓаат на населени места, предизвикувајќи повреди кај цивили и материјална штета.
Судирите меѓу двете земји ескалираа по заедничката израелско-американска офанзива против Иран, започната на 28 февруари. Оттогаш, според официјалните податоци, во Израел животот го загубиле 12 лица.
