Корпусот на исламската револуционерна гарда издаде итно предупредување до граѓаните да останат дома, истовремено најавувајќи дека планира целосно да го блокира Ормускиот теснец, стратешка точка од глобално значење за транспортот на нафта.
Според извештаите на државната телевизија ИРИБ њуз, секој што би се обидел да се спротивстави на властите ќе се соочи со многу построги репресивни мерки отколку што беше случајот на протестите од крајот на декември и почетокот на јануари, кои според американската организација HRANA, однесоа повеќе од 7.000 животи.
„Нема да има привилегии за предавниците, ќе ги гониме 24 часа дневно“, стои во соопштението на гарда.
Иранските власти исто така информираа дека по наредба на новиот врховен лидер Моџтаба Хамнеи, сите танкери и бродови што пловат низ Ормускиот теснец ќе мора да се придржуваат до иранските безбедносни прописи. Гардата додаде дека ќе продолжи со „напади со полна сила“ против американски и израелски цели во регионот.
Овие закани веќе се чувствуваат на глобалниот енергетски пазар. Поради нападите врз комерцијални бродови, движењето низ теснецот, кој е широк околу 55 километри помеѓу Иран и Оман, е сериозно нарушено. Тоа предизвикува зголемување на цените на нафтата и бензинот, со директно влијание врз светската економија.
