Иранскиот амбасадор во Обединетите нации во Женева, Али Бахреини, упати остро предупредување дека секоја воена база што се користи за напади врз Иран, вклучително и оние надвор од Блискиот Исток, би можела да се најде на мета на иранските вооружени сили.
„Нашите сили го објавија јасно: секој објект и секоја база која служи за агресија кон нашата земја е легитимна цел“, рече Бахреини во разговор со „Еуроњуз“. На прашањето дали ова се однесува и на локации во Европа, амбасадорот одговори дека Иран ќе преземе сите потребни мерки за да ја обезбеди безбедноста на својата територија и да спречи каква било форма на напад.
Во однос на последните напади во Персискиот Залив, Бахреини негираше дека Техеран таргетирал цивилни цели. Тој ги обвини САД и Израел за ескалацијата и нагласи дека иранските операции се насочени исклучиво кон воени објекти. „Нашите цели се само оние бази кои се користат против Иран“, истакна тој, одговарајќи на прашања за инцидентите во Обединетите Арапски Емирати, Саудиска Арабија и Катар.
Бахреини, истовремено, порача и дипломатска порака: Иран сака добрососедски односи и ја нагласи блискоста со соседните земји, подвлекувајќи дека постои чувство на заедништво и пријателство во регионалните врски.
