Регулаторната комисија за енергетика денеска треба да ги соопшти новите малопродажни цени на горивата, а според актуелните пазарни трендови, речиси извесно е дека возачите повторно ќе се соочат со поскапување.
Само пред една недела, во редовното понеделничко усогласување, дизелот поскапе за дури 14,5 денари по литар, додека цените на бензините беа зголемени за пет денари. Новото пресметување на Регулаторната доаѓа во услови на раст на светските цени на суровата нафта, но и засилен долар во однос на денарот, два фактори кои директно влијаат врз формирањето на домашните цени на нафтените деривати.
Истовремено, глобалните енергетски пазари беа обележани со нагло поскапување на нафтата, која повторно ја надмина границата од 100 долари за барел. Дополнителен притисок врз цените создаде и блокадата на Ормускиот Теснец, еден од најважните светски енергетски коридори.
Во очекување на новиот ценовен шок, од Владата најавуваат можни интервентни мерки. Доколку растот на цените биде изразен, се разгледува опција за намалување на данокот на додадена вредност за горивата, прво од 18 на 10 проценти, а доколку трендот на поскапување продолжи, и на 5 проценти. Ваквите чекори, според најавите, ќе зависат од понатамошното движење на цените на светските берзи.
