Во Брисел, во рамките на големиот 50-годишен јубилеј на Европската народна партија, хрватскиот премиер Андреј Пленковиќ се сретна со премиерот на Македонија, Христијан Мицкоски, потврдувајќи ја поддршката на Хрватска за европската интеграција на земјата.
На средбата, која се одржа во духот на европското партнерство, двајцата лидери разговараа за тековните глобални случувања и геополитичките предизвици кои ја тресат Европа, особено безбедноста на снабдувањето со енергија во Југоисточниот регион и стратегиите на владите за справување со растот на цените на енергентите. Пленковиќ истакна дека Северна Македонија заслужува јасна перспектива за членство во Европската Унија и дека Хрватска ќе остане силен поддржувач на овој процес.
Мицкоски, кој во Брисел престојува со делегација на ВМРО-ДПМНЕ до 20 март, на својот профил на Фејсбук нагласи дека разговорите биле насочени кон зајакнување на билатералните односи, регионалната соработка и европската перспектива на неговата земја, како и кон зацврстување на партнерството во рамките на европското семејство.
Освен средбата со Пленковиќ, Мицкоски ќе присуствува и на конгресот на Европската народна партија, на кој се очекува присуство на највисоките европски лидери, вклучувајќи ја претседателката на Европската комисија, Урсула фон дер Лајен, и претседателката на Европскиот парламент, Роберта Мецола.
