Јеменското движење Хути официјално објави дека се приклучува на актуелниот конфликт на Блискиот Исток, преземајќи одговорност за ракетен напад врз Израел. Ова претставува прва директна акција на Хутите против израелска територија од почетокот на новата ескалација во регионот.
Според информациите, нападот бил извршен само неколку часа откако израелските одбранбени сили соопштија дека детектирале лансирање ракета од Јемен кон нивна територија. Активирана била противвоздушната одбрана, со цел неутрализирање на заканата.
Портпаролот на Хутите, Џахја Сари, во видео објавено на социјалната мрежа X изјави дека движењето ја спровело својата „прва операција“ против Израел, при што биле погодени „чувствителни воени цели“ со балистички ракети.
Претходно, Хутите најавија дека ќе се приклучат на конфликтот, кој дополнително се вжешти по американско-израелските активности насочени кон Иран. Во своето обраќање, Сари предупреди дека нивното движење е подготвено за директна воена интервенција доколку дојде до понатамошна ескалација или сојузничка офанзива против Иран или други земји во регионот.
Хутите, кои контролираат значителен дел од Јемен, се дел од т.н. „оска на отпорот“ – неформална коалиција поддржана од Иран, во која влегуваат и Хезболах, Хамас и други проирански групи во регионот.
Во изминатите години, особено за време на конфликтот во Појасот Газа, Хутите извршија бројни напади со ракети и беспилотни летала, насочени не само кон Израел туку и кон комерцијални бродови во Црвеното Море. Овие напади значително го нарушија поморскиот сообраќај низ еден од најважните светски трговски коридори.
Ескалацијата во регионот дополнително ги зголемува стравувањата од поширок конфликт, со оглед на вклучувањето на повеќе регионални и глобални актери, што може да има сериозни последици врз безбедноста и економијата на глобално ниво.
