Русија повторно протера британски дипломат, овој пат по обвинувања за шпионажа, јавува ДПА. Според извештаите на руските медиуми, службите за безбедност откриле дека дипломатот бил вклучен во „непријавени разузнавачки активности“, поради што му е наложено да ја напушти земјата во рок од две недели.
Руската Федерална служба за безбедност (ФСБ) тврди дека дипломатот се обидувал да прибере чувствителни податоци за руската економија и дека давал лажни информации на властите. Според ФСБ, неговите активности се оценети како разузнавачки и субверзивни, со директно загрозување на безбедноста на Русија.
Британската дипломатска мисија во Москва, предводена од вршителката на должност амбасадор Данае Џолакија, била повикана во руското Министерство за надворешни работи поради инцидентот.
Ова е втор британски дипломат протеран од Русија оваа година поради наводни шпионски активности. Во јануари, руското МНР предупреди дека нема да толерира „активности на непријавени британски разузнавачи“ на руска територија, откако беше протеран првиот дипломат.
