Советот на јавни обвинители направи пресврт во случајот со Јован Цветановски, неговата суспензија е укината, а предметот се враќа на повторно разгледување поради сериозни пропусти во првостепената постапка. Со оваа одлука, Цветановски повторно седнува во обвинителската фотелја, додека дисциплинската постапка продолжува од почеток, но со јасни насоки од Советот.
Претседателот на Советот, Башким Бесими, објасни дека членовите едногласно утврдиле дека одлуката на Првостепената комисија е оптоварена со недостатоци кои не можат сами да ги коригираат. Наместо тоа, предметот го враќаат назад, со очекување Комисијата да донесе нова, правно издржана одлука. Доколку повторно има жалби, Советот ќе реагира повторно, но во рамки на своите ограничени надлежности.
Суспензијата, како што нагласи Бесими, паднала токму поради тие слабости во решението. Тоа, практично, значи дека нема правна пречка Цветановски веднаш да се врати на работа.
Инаку, Цветановски беше во фокусот на јавноста поради неговата улога во предметот за бонусите во поранешното Специјално јавно обвинителство. Неговата суспензија тогаш отвори сериозни прашања, самиот тврдеше дека станува збор за притисок и обид да се дискредитира, бидејќи одбил да потпише, како што рече, „незаконска одлука“. Дополнително, јавно говореше за влијанија од колеги обвинители и политички мотивирана позадина на случајот.
На истата седница, Советот го затвори и дисциплинскиот предмет против поранешниот виш обвинител Мустафа Хајрулахи, но не поради некаква одлука по суштината, туку затоа што тој веќе поднел барање за престанок на функцијата.
Хајрулахи, кој претходно беше суспендиран, се соочуваше со сериозни обвиненија од Основното јавно обвинителство Штип, пет дела за малтретирање во службата и едно за злоупотреба на положбата. Според обвинението, во период од повеќе од една година, наводно вршел психолошки притисок и закани врз вработени, користејќи ја својата позиција. Тој, пак, остро ги негираше сите наводи, нарекувајќи ги политички конструирани и поврзани со неговото постапување во чувствителни предмети.
Советот се осврна и на иницијативата на обвинителката Ленче Ристоска, која алармираше за политички притисоци врз нејзината работа, посочувајќи кон изјави од власта и објави на ВМРО-ДПМНЕ. Сепак, членовите на Советот оценија дека нема доволно конкретни елементи што би докажале директно влијание врз нејзината независност, особено бидејќи во спорните изјави не било експлицитно спомнато нејзиното име.
Бесими остави отворена врата за поинаков исход во иднина, нагласувајќи дека секој случај има своја тежина и дека различни околности би можеле да доведат до ново разгледување.
Во меѓувреме, Советот најави и нов бран вработувања, ќе се распишат огласи за обвинители во повеќе градови, меѓу кои Ресен, Крива Паланка, Кочани, како и во вишите обвинителства во Битола и Скопје.
На крајот од седницата, републичкиот обвинител Ненад Савески упати јасен апел: потребна е поголема јавна комуникација за да се охрабрат правниците да конкурираат. Според него, системот не смее да остане без свеж кадар, напротив, мора активно да се мотивираат нови луѓе да влезат во обвинителската професија.
