Новиот систем со „паметни“ камери во Атина, веќе почна да ја следи сообраќајната дисциплина, при што во првите два дена од работењето биле изречени 130 административни казни.
Овој пилот-проект е имплементиран во регионот Атика и се базира на камери опремени со вештачка интелигенција, кои автоматски детектираат сообраќајни прекршоци и ги испраќаат казните дигитално до возачите. Системот официјално започна со работа на 28 март 2026 година, а известувањата се достапни преку националната платформа gov.gr и мобилната апликација Gov.gr Wallet.
Според првичните податоци, најчесто регистрираните прекршоци се поминување на црвено светло и неносење кацига од страна на мотоциклистите. Сепак, технологијата е дизајнирана да следи и други прекршоци, како пречекорување на брзината, возење или паркирање во автобуски ленти, неносење сигурносен појас и користење мобилен телефон додека возилото е во движење.
Во моментов, камери се поставени на осум критични точки во Атика, додека десет автобуси се опремени со мобилни камери за контрола на илегално користење на автобуските ленти. Целта на проектот, според грчките власти, е да се намалат сообраќајните несреќи и да се поттикне поодговорно однесување на возачите.
Системот ја користи технологијата за автоматско препознавање на регистарски таблички и алгоритми за анализа, кои овозможуваат идентификација на марката, моделот и бојата на возилото, како и видот на прекршокот. Дополнително, податоците можат да се проверуваат за осигурување на возилото, валидност на технички преглед, платени давачки и исполнување на другите законски услови за учество во сообраќајот.
