Италијанскиот регион Трентино се издвојува со уникативен проект кој не само што нуди напуштени куќи по цена од симболично едно евро, туку и значителна финансиска поддршка за оние кои се одлучат да ги оживеат старите имоти. Од 2026 година, секој што сака да се пресели во некое од 33-те вклучени села може да добие до 100.000 евра за купување и реновирање на куќата на својот сон.
Вкупниот фонд од 10 милиони евра е наменет за следните две години, со јасна цел: да се врати животот во руралните средини и да се зголеми бројот на жители во овие идилични планински предели.
Програмата е отворена за сите, италијански граѓани и странци, но со одредени услови. Лицата надвор од Европската Унија мора да имаат соодветна виза или дозвола за престој, а секој учесник мора законски да има право да купи недвижност во Италија. Апликациите ќе се примаат во два периода: од 19 мај до 30 јуни и од 8 септември до 23 октомври.
Средствата се строго насочени: до 20.000 евра можат да се користат за купување на имот, додека до 80.000 евра се резервирани за реновирање. Реставрацијата не смее да надмине вкупно 200.000 евра, што оставa простор за сопствени инвестиции до 120.000 евра.
Се поставуваат и услови за живот: новите сопственици мора да живеат во куќата најмалку 10 години или, доколку ја издаваат, тоа да биде по прифатлива цена. Во спротивно, државата ќе бара враќање на доделените средства. Интересно, програмата не е достапна за лица помлади од 45 години кои веќе живеат во Трентино, со цел да се привлечат нови жители од други региони и земји.
