Глобалните цени на храната забележаа раст во март, поттикнати главно од поскапувањето на енергенсите, кое е резултат на ескалацијата на конфликтот на Блискиот Исток, соопшти Организацијата за храна и земјоделство на Обединетите нации (ФАО).
Според ФАО, нивниот индекс на цените на храната, кој ја следи глобалната трговија со основни прехранбени производи, во март достигна 128,5 поени – што претставува пораст од 2,4% во споредба со ревидираните февруарски податоци. „Почетниот скок на цените беше умерен, бидејќи го поттикнаа поскапувањата на нафтата, додека обилните глобални резерви на житни култури го ублажија ефектот“, објаснува главниот економист на ФАО, Максимо Тореро.
Сепак, тој предупредува дека ако конфликтот продолжи подолго од 40 дена, а трошоците за земјоделските влезни материјали останат високи, производителите може да бидат приморани да користат помалку семиња, ѓубрива и хемикалии, да намалат површините за садење или дури да ги заменат одредени култури. Тоа би значело пониски приноси во наредниот период и неизбежен притисок врз глобалното снабдување со храна и цените за остатокот од оваа година и почетокот на следната.
