Армијата на Македонија ќе се опреми со карабини од типот М4, во рамки на договор што го додели Министерството за одбрана на САД на компанијата Колт мануфактуринг.
Станува збор за договор со максимална вредност од 40,86 милиони долари, кој предвидува производство и испорака на моделите М4 и М4А1 за повеќе странски партнери, меѓу кои се и Северна Македонија, Босна и Херцеговина, Ирак и Тунис. Договорот е со фиксна цена и е склучен по принципот неопределена испорака/неопределена количина, а неговата важност трае до 31 март 2031 година.
Од американското Министерство за одбрана посочуваат дека ваквите набавки се дел од програмите за странска воена помош, со цел зајакнување на капацитетите на партнерските армии. Со воведувањето на платформата М4, се очекува да се подобри интероперабилноста со сојузничките сили, особено во рамки на НАТО, преку стандардизација на обуката, логистиката и снабдувањето со муниција.
Карабинот М4 важи за едно од најраспространетите пешадиски оружја во светот. Тој е развиен врз основа на семејството М16, односно платформата АР-15, и претставува пократка и полесна варијанта, наменета за поголема подвижност на војниците.
Поради своите карактеристики, М4 е особено погоден за операции во урбани и ограничени простори, како и за употреба од страна на механизирани единици и специјални сили, што го прави стандардно оружје во многу современи армии.
…
