Американските специјални сили извршиле операција на територијата на Иран со цел спасување на член од екипажот на соборен борбен авион Ф-15, јавуваат меѓународните медиуми.
Според информациите, иранските сили го собориле американскиот авион во нивниот воздушен простор, што претставува прв ваков случај од почетокот на конфликтот. Двајцата членови на екипажот успеале да се катапултираат, по што започнала трка меѓу двете страни за нивно пронаоѓање.
Во спасувачката мисија биле вклучени два американски воени хеликоптери, како и авиони за дополнување гориво во воздух. За време на операцијата, хеликоптерите биле изложени на оган од иранска страна, при што едниот бил погоден и оставил трага од чад при повлекувањето.
И покрај нападот, двата хеликоптери успешно се вратиле на ирачка територија, а едно лице од екипажот било извлечено на безбедно.
Судбината на вториот пилот засега останува непозната. Во меѓувреме, иранските медиуми објавија снимки од локални милициски сили кои се вклучиле во потрагата по преостанатиот член на екипажот.
