Од полноќ, граѓаните ќе почувствуваат благо олеснување на пумпите. Цените на бензинот се намалуваат за два денара по литар, додека дизелот останува на исто ниво. Ова го најави премиерот Христијан Мицкоски по вчерашната итна седница на Владата.
Владината одлука предвидува намалување на акцизата: за дизелот за четири денари, а за бензините за два денара. Дополнително, се продолжува мерката за намалена ДДВ стапка за горивата: од 18 на 10 отсто, а со компанијата ОКТА е договорено да остане во сила и специјалниот попустм два денара кај бензинот и три денара кај дизелот, најмалку до крајот на април.
Мицкоски истакна дека мерките се насочени кон ублажување на ценовниот притисок врз домаќинствата и зачувување на животниот стандард. И покрај забележаното зголемување на побарувачката, особено во пограничните региони каде таа се зголемила и трикратно, засега нема потреба од ограничување на количините за странските купувачи.
Владата не ја исклучува можноста за дополнителни интервенции ако кризата се продолжи. Меѓу идеите се повторно намалување на ДДВ за основните прехранбени производи од 5 на нула отсто и враќање на мерката за замрзнување на маржите, со опција ефектите од ваквите мерки да останат и по формалното укинување, со цел спречување на нагло поскапување на производите.
