Бил Реди, извршен директор на Pinterest, јавно ја поддржа неодамнешната австралиска одлука да се забранат социјалните мрежи за помлади тинејџери и повика други земји да следат сличен пример. Во колумна за Time, Реди истакна дека „социјалните медиуми, во сегашната форма, не се безбедни за лица под 16 години“ и дека е потребен „јасен стандард со вистинско спроведување и одговорност за апликациите и мобилните системи“.
Иако ова може да звучи контрадикторно за шеф на платформа која привлекува голем дел од генерацијата Z, Реди нагласува дека Pinterest веќе има строг пристап кон помладите корисници. На платформата, сите тинејџерски сметки се приватни по дифолт, а функциите за пораки се исклучени за лица под 16 години.
„Нашите политики покажуваат дека заштитата на младите не ја намалува нивната активност, туку ја гради довербата“, напиша Реди, објаснувајќи дека безбедноста и благосостојбата на корисниците е и стратегиска предност за бизнисот.
Pinterest се смета за „платформа за визуелно пребарување“ и не дозволува регистрација на лица под 13 години. Сепак, компанијата се соочила со критики во минатото. Истражување на NBC News од 2023 година покажа дека алгоритмот понекогаш прикажувал слики од млади девојки на возрасни корисници кои пребарувале таква содржина, а некои табли на Pinterest содржеле контроверзни ознаки како „секси девојки“. Како одговор, компанијата го направи присуството на тинејџерките под 16 години приватно и непребарливо.
Реди го користи примерот на Pinterest како доказ дека грижењето за младите корисници не само што е етички исправно, туку и економски исплатливо. „Безбедните и внимателни политики за млади корисници создаваат доверба, а довербата привлекува луѓе“, заклучува тој.
