И Русија и Украина соопштија дека ќе се придржуваат до договорениот велигденски прекин на огнот, но само доколку не дојде до провокации од спротивната страна.
Министерството за одбрана на Русија информираше дека 32-часовното примирје започнало во 16 часот по московско време, односно во 13 часот по Гринич. Прекинот на огнот беше најавен од рускиот претседател Владимир Путин и треба да трае од 11 април до крајот на 12 април.
Путин предупреди дека Москва ќе реагира на секој евентуален напад од украинска страна, нагласувајќи дека примирјето не значи целосно намалување на готовноста на руските сили.
Од украинска страна, претседателот Володимир Зеленски потврди дека Киев ја прифаќа иницијативата, но истакна дека ќе следи одговор доколку дојде до прекршување на договорот.
Зеленски порача дека отсуството на напади од Русија ќе значи и воздржаност од украинска страна, додавајќи дека Велигден треба да биде период на мир и безбедност. Тој посочи дека постои подготвеност за продолжување на примирјето и по празникот, доколку условите тоа го дозволат.
