Дипломатските напори меѓу Вашингтон и Техеран повторно запнаа, откако последната рунда разговори, одржана викендов во Исламабад, не донесе напредок околу клучното прашање: колку долго Иран би ги суспендирал своите нуклеарни активности.
Според извори блиски до преговорите, јазот меѓу двете страни останува длабок. Американските претставници излегле со предлог за долгорочно решение: дведецениска пауза на иранската нуклеарна програма. Со тоа, како што се наведува, би се зачувала формалната позиција на Техеран дека не се откажува трајно од правата што му следуваат според меѓународните договори.
Но, иранската страна не е подготвена да оди толку далеку. Наместо тоа, понудила значително пократок период на ограничување до пет години, што веќе било предложено и на претходните средби во Женева, кои исто така завршиле без конкретен исход.
Несогласувањата не застануваат тука. На маса остануваат и други чувствителни теми, меѓу кои безбедноста и слободата на пловидба низ Ормутскиот теснец, како и регионалната улога на Иран и неговата поддршка за вооружени групи на Блискиот Исток.
И покрај континуираните дипломатски обиди, клучната пречка останува непроменета: Техеран не прифаќа целосно укинување на својата нуклеарна програма, ниту демонтажа на постојната инфраструктура, чекор што Вашингтон го гледа како неопходен предуслов за постигнување долгорочен и стабилен договор.
