Постои мала, речиси скриена функција во Windows што може драматично да го расчисти хаосот на екранот, а сепак останува непозната за голем дел од корисниците.
Со едноставно движење, односно брзо „протресување“ на активниот прозорец за неговата горна лента, сите останати отворени апликации веднаш исчезнуваат од видик. На екранот останува само она на што моментално работите, без потреба од дополнителни кликови или пребарување низ прозорци.
Оваа практична можност не е новитет. Првпат се појави уште со Windows 7 во 2009 година под името Aero Shake. Иако и денес е дел од Windows 11 (сега наречена Title bar window shake), Microsoft ја има оставено исклучена по дифолт, па многумина никогаш не ја ни забележуваат.
Интересно е што функцијата има и „обратен ефект“: ако повторно го протресете истиот прозорец, сите претходно минимизирани апликации се враќаат точно таму каде што биле. Ова ја прави особено корисна во ситуации како онлајн состаноци или споделување екран, кога сакате експресно да ги сокриете приватните содржини.
Активирањето е едноставно, доволно е да влезете во Settings, да ја отворите секцијата System, па Multitasking, каде што се наоѓа опцијата што треба да ја вклучите. Промената стапува на сила веднаш, без рестартирање.
За оние што не сакаат да „тресат“ прозорци, постојат и алтернативи: комбинацијата Win+Home ги минимизира сите освен активниот прозорец, додека Win+D ве носи директно на работната површина со еден потег.
