Премиерот Христијан Мицкоски најави дека следната недела се очекува дополнително намалување на цените на горивата, оценувајќи дека состојбата со нафтените деривати во земјата е стабилна.
Тој посочи дека државата располага со исти количини на нафтени резерви како и на почетокот на кризата и дека не е потрошен ниту еден литар. Според него, дневната потрошувачка останува висока, со испораки од над два милиони литри дизел и бензин.
Мицкоски нагласи дека земјата има едни од најниските цени на горивата во регионот, додавајќи дека Владата веќе презела мерки за намалување на цените во изминатиот период.
Следејќи ги движењата на светските пазари, каде цената на нафтата се движи околу 90 до 91 долар за барел, тој изрази очекување дека трендот на поевтинување ќе продолжи и во наредните денови.
Во однос на мерките, премиерот најави дека Владата ќе одржи дополнителна седница на која ќе се разгледа продолжување на намалената стапка на ДДВ за горивата од 10 проценти, наместо редовните 18 проценти. Истовремено, акцизите ќе се прилагодуваат во зависност од состојбата на берзите.
Тој информираше дека договорот со ОКТА за попусти важи до крајот на април, но дека се водат разговори за дополнително намалување на цената, особено кај дизелот, кој учествува со најголем дел во вкупната потрошувачка.
…
