Иранските власти соопштија дека Ормуски теснец е целосно отворен за сите комерцијални бродови, во рамки на актуелното примирје поврзано со ситуацијата во Либан.
Министерот за надворешни работи на Иран, Абас Арагчи, изјави дека одлуката е донесена координирано со надлежните институции и ќе важи до истекот на примирјето. Тој посочи дека пловидбата ќе се одвива по однапред утврдени рути, со цел да се обезбеди безбедност и непречен проток на трговскиот сообраќај.
Ваквата одлука доаѓа по зголемените тензии во регионот, особено по остриот настап на високиот ирански воен советник Мохсен Резаеи, кој предупреди дека Техеран би реагирал доколку САД се обидат да воспостават контрола врз теснецот.
Резаеи, поранешен командант на Револуционерната гарда, упати директни закани дека американските бродови би можеле да бидат нападнати доколку се приближат до оваа стратешка зона. Во своите изјави го спомена и актуелниот американски претседател Доналд Трамп, обвинувајќи го за амбиции да ја преземе улогата на „полицаец“ во Ормускиот теснец.
Во меѓувреме, САД воведоа поморска блокада на дел од иранските пристаништа, по неуспешните директни разговори меѓу Вашингтон и Техеран одржани во Пакистан, со цел ставање крај на конфликтот кој започна на 28 февруари.
Ормускиот теснец претставува една од најважните светски нафтени рути, низ која минува значителен дел од глобалниот енергетски извоз, поради што секоја ескалација во овој регион има директно влијание врз светските пазари.
…
