Процесот на екипирање на дипломатската мрежа влегува во завршна фаза, најави министерот за надворешни работи Тимчо Муцунски, потенцирајќи дека институциите интензивно работат на пополнување на испразнетите амбасадорски и конзуларни позиции низ светот.
Според него, дел од предложените кандидати веќе добиле зелено светло на владина седница, додека за останатите сè уште трае редовната дипломатска процедура. Иако јавноста засега нема да дознае конкретни имиња, Муцунски објасни дека тоа се должи на чувствителноста на постапката, која во оваа фаза останува класифицирана.
„За сите кандидати се испратени барања за агреман. За дел од нив веќе пристигнаа одговори, додека за други сè уште се чека, што е вообичаена пракса во меѓународните односи“, истакна министерот.
Тој додаде дека паралелно со новите именувања, на одредени амбасадори им истекуваат мандатите, но уверува дека планот е во блиска иднина да се обезбеди целосна кадровска пополнетост на дипломатско-конзуларните претставништва.
Со тоа, како што посочи Муцунски, државата ќе има стабилно и функционално дипломатско присуство, подготвено да одговори на предизвиците и приоритетите на надворешната политика.
…
