Претседателот на Владата, Христијан Мицкоски, заедно со владина делегација престојува во официјална политичка и економска посета во Виена, Република Австрија, каде во фокусот се продлабочувањето на билатералната соработка и отворањето нови економски перспективи меѓу двете држави.
Во рамки на посетата, предвидена е средба со австрискиот канцелар, на која ќе се разговара за клучни прашања поврзани со Европа и регионот, како и за унапредување на политичките и економските односи. Очекувањата се дека разговорите ќе дадат нов импулс на соработката, особено во делот на инвестициите и заедничките проекти.
По официјалната средба, премиерот и австрискиот канцелар ќе се обратат на бизнис форум пред претставници на стопанските комори и компании од двете земји. Таму ќе се реафирмира досегашната економска соработка, но и ќе се презентираат конкретни можности за нови инвестиции, со посебен акцент на инфраструктурата, енергетиката и индустријата.
Во состав на владината делегација се и вицепремиерот и министер за транспорт и врски, Александар Николоски, министерот за надворешни работи и надворешна трговија Тимчо Муцунски, министерката за енергетика, рударство и минерални суровини Сања Божиновска, како и министерот за животна средина и просторно планирање Муамет Хоџа.
Посетата се оценува како важен чекор во зајакнување на економските врски меѓу Македонија и Австрија, со јасна порака дека двете земји се подготвени за подлабока и поинтензивна соработка во наредниот период.
