Грција презема една од најстрогите мерки досега во обид да ја сопре растечката комерцијализација на своето крајбрежје, прогласувајќи 251 плажа за таканаречени „црвени зони“: области во кои човечката интервенција е сведена на минимум.
Со новиот режим, на овие делови од брегот се забранува поставување лежалки, чадори, привремени барови и какви било други објекти кои би ја менувале природната слика на плажите. Тие ќе останат целосно слободни од комерцијална експлоатација.
Значителен дел од овие локации се наоѓаат во рамки на европската еколошка мрежа НАТУРА 2000, што дополнително ја зајакнува нивната заштита. Од грчкото Министерство за животна средина порачуваат дека овој чекор не е само административна одлука, туку дел од поширока стратегија за зачувување на крајбрежните екосистеми и нивната природна форма.
Според властите, целта е да се стави крај на неконтролираниот туристички притисок и да се воспостави порамнотежен модел на развој, во кој природата нема да биде жртва на профитот.
„Сакаме туризам кој ќе биде одржлив, кој ќе ја зачува автентичноста на грчкото крајбрежје и ќе ја заштити неговата привлечност за идните генерации, без бетон и прекумерна комерцијализација“, порачуваат од Министерството.
…
