Извор: Jutarnji.hr
Пензионираниот руски генерал Јуриј Балуевски, некогашен началник на Генералштабот и поранешен заменик-министер за одбрана, излезе со една од најострите јавни критики кон руското раководство од почетокот на војната во Украина, ставајќи под знак прашање не само воената стратегија, туку и политичкиот правец на земјата.
Во обраќање пред руската Јавна комора, тој се осврна на тоа дека Москва со години ја нагласувала својата технолошка предност, особено во развојот на хиперсонично оружје, но според него тоа не донело реална безбедност ниту стратегиска предност. Во тој контекст, Балуевски иронично забележа дека самото фалење со воена моќ не ја променило ранливоста на државата.
Еден од поострите делови од неговиот настап се однесуваше на тоа што, како што рече, Русија не реагирала доволно решително на низа украински напади во последните години. Тој посочи на инциденти со дронови, вклучително и симболични цели во Москва, како и удари врз воена инфраструктура, прашувајќи зошто реакцијата на руската страна била воздржана и одложена.
Балуевски се осврна и на концептот на таканаречените „црвени линии“, оценувајќи дека тие повеќепати биле преминати без соодветен одговор, што според него ја поткопува сликата за одвраќање. Во неговиот говор се чувствуваше и загриженост за долгорочните последици од ваквата стратегија, особено во контекст на засилените украински напади и способноста на Киев да дејствува подлабоко на руска територија.
Тој предупреди дека продолжувањето на војната во форма на исцрпување може да има сериозни последици за Русија, отворајќи прашања за границите на издржливост и за конечната цел на конфликтот. Во таа насока, тој постави дилема дали актуелниот пристап навистина води кон победа или кон постепено слабеење на државата.
Во завршниот дел од неговите изјави, Балуевски предупреди и на, како што ги нарече, заканувачки пораки од Западот за долгорочна геополитичка конфронтација, додавајќи дека времето не работи во корист на Русија доколку стратегијата не се промени.
…
