Нов инцидент е регистриран во Зоолошка градина Скопје, откако на социјалните мрежи се појави видео на кое млада девојка се качува на заштитната ограда кај делот со мајмуните.
На снимката се гледа како вработена во зоолошката градина ја предупредува девојката да се симне, со цел да се спречи потенцијално опасна ситуација и вознемирување на животните.
Случајот повторно ја отвори темата за непочитување на правилата од страна на посетителите. И покрај поставените табли со јасни предупредувања дека животните не смеат да се хранат или вознемируваат, ваквите ситуации, според надлежните, се случуваат сѐ почесто.
„Недостасува култура и едукација, но и поголем надзор и санкции за прекршителите“, стои во реакцијата објавена на социјалните мрежи.
Одговорните апелираат до родителите, наставниците и институциите да придонесат кон подигнување на свеста кај граѓаните, со цел ваквите инциденти да не се повторуваат и да се обезбеди безбедност и за посетителите и за животните.
…
