Еден ден по злосторството што ја потресе јавноста во Сараево, излегуваат нови детали за движењето и апсењето на осомничениот за убиството на новинарката Елма Годињак. За убиството е осомничен нејзиниот поранешен сопруг Тарик Прусац, со кого имала петгодишна ќерка и со кого била во процес на развод.
Според информациите од истрагата, пукањето било пријавено на 1 мај околу 16:15 часот во населбата Добриња. По пристигнувањето на службите за итна помош, било пронајдено безживотното тело на Годињак, по што полицијата започнала опсежна потрага по осомничениот.
Додека полицијата го блокирала реонот и го пребарувала подрачјето, Прусац, според медиумските извештаи, слободно се движел низ градот. Во текот на бегството, тој ја зел нивната малолетна ќерка и се упатил кон центарот на градот, поточно во Башчаршија, каде наводно седнал да јаде ќебапи.
Токму таму бил лоциран од полицијата, а набргу потоа и уапсен во општината Стари Град, нешто по 19 часот. Девојчето било пронајдено неповредено и е предадено на надлежните служби.
Од Обвинителството на Сараевскиот кантон потврдија дека осомничениот е приведен и во текот на денот ќе биде предаден на нивна надлежност, додека истрагата продолжува за целосно расветлување на случајот.
Според досегашните информации, Прусац работел како обезбедувач и наводно ја убил Годињак со службен пиштол, кој не смеел да го поседува надвор од работното време. Овој факт отвора дополнителни прашања за контролата на оружјето во приватните агенции за обезбедување.
Адвокатката на жртвата, Елмедина Бојичиќ, изјави дека Годињак подолг период се чувствувала загрозено и дека повеќепати го пријавувала осомничениот за демнење и вознемирување. Во моментот на убиството, против него била изречена и мерка за забрана за приближување.
„Тој не беше класично насилен, но неговото однесување беше вознемирувачко. Постојано ја следеше и таа се плашеше за својот живот“, изјави адвокатката, додавајќи дека колеги на новинарката често ја придружувале до дома поради страв за нејзината безбедност.
Полицијата во меѓувреме ги демантираше информациите дека братот на жртвата бил повреден во нападот, додека јавноста бара одговорност од институциите, со оглед на тоа што постоеле претходни пријави за закани и вознемирување.
Овој случај повторно ја отвори темата за заштитата на жртвите од семејно насилство и ефикасноста на институциите во спречување на вакви трагедии. Истрагата е во тек, а се очекуваат дополнителни информации во наредните денови.
