Тензичната ситуација во Ормускиот Теснец сериозно се заострува, откако според извештаи на Си-Ен-Ен дошло до директна воена размена меѓу американските и иранските сили во еден од најчувствителните поморски коридори во светот.
Според американски воени извори, командантот на Централната команда на САД, адмирал Бредли Купер, потврдил дека американските сили уништиле шест ирански брзи морнарички пловила. Инцидентот, како што се наведува, се случил по бран ирански напади во кои биле користени крстосувачки ракети, беспилотни летала и мали брзи чамци насочени кон американски воени бродови, како и кон комерцијални пловила кои биле под американска заштита.
Американската страна тврди дека одговорот бил изведен со воздушна поддршка, при што во операцијата биле ангажирани борбени хеликоптери AH-64 „Apache“ и SH-60 „Seahawk“. Ова, според истите извори, претставува прв директен напад од иранска страна по најавеното примирје.
Во меѓувреме, политичката реакција од Вашингтон дополнително ја зголеми напнатоста. Претседателот Доналд Трамп преку својата платформа „Трут соушл“ објави порака во која тврди дека американските сили погодиле повеќе ирански пловни објекти, истовремено алудирајќи дека дел од нападите биле насочени и кон трети држави, меѓу кои и јужнокорејски товарен брод.
Трамп, во интервју за „Фокс њуз“, отиде чекор понатаму, предупредувајќи дека секој иден напад врз американски бродови во Персискиот Залив или Ормускиот Теснец би предизвикал „катастрофални последици“ за иранските сили. Тој најави и дека Пентагон ќе одржи вонредна прес-конференција на која ќе бидат презентирани детали од операцијата.
Паралелно со овие случувања, регионот се соочи со серија дополнителни инциденти. Јужнокорејските власти соопштија дека товарниот брод „HMM Namu“, кој бил закотвен во близина на Обединетите Арапски Емирати, бил погоден во експлозија што се истражува како можен напад. Иако 24-члениот екипаж, меѓу кои и јужнокорејски и странски државјани, не е повреден, инцидентот ја зголеми загриженоста за безбедноста на цивилната пловидба во регионот.
Дополнително, од територијата на Обединетите Арапски Емирати биле пријавени повеќекратни ракетни закани, при што, според тамошното Министерство за одбрана, дел од нив биле пресретнати од системите за воздушна одбрана, а една ракета паднала во морето. Жителите во неколку емирати пријавиле силни експлозии како резултат на активираните одбранбени системи.
Ситуацијата добива уште посериозен тон по извештаите за пожар во нафтен објект во Фуџаира, кој наводно бил погоден од беспилотно летало.
Во исто време, безбедносни извори тврдат дека Израел уште на почетокот на ескалацијата дискретно испратил систем за противвоздушна одбрана „Железна купола“ во Обединетите Арапски Емирати. Според тие информации, системот бил активиран и денеска, при што пресретнал иранска ракета насочена кон територијата на земјата.
ВИДЕОТО МОЖЕТЕ ДА ГО ПОГЛЕДНЕТЕ ТУКА
…
