Сингапур повторно ја отвори дебатата за дисциплината во училиштата откако властите предложија ученици кои вршат малтретирање, вклучително и преку интернет, да можат да бидат казнети со телесна казна со стап. Мерката, која веќе предизвика реакции во јавноста, би се применувала само во ограничени случаи и главно за момчиња постари од девет години.
Според образложението во парламентот, станува збор за најстрога воспитна мерка што би се користела само кога сите други дисциплински постапки не даваат резултат. Министерот за образование Дезмонд Ли нагласи дека физичкото казнување не е прва опција, туку „последно средство“ во ситуации на сериозно или повторено насилничко однесување.
Тој појасни дека секој таков случај би поминувал низ строг процес на одобрување во училиштата, при што конечната одлука би ја донесувал директорот, а казната би ја извршувале само специјално овластени наставници. Според Ли, при оценувањето би се земале предвид возраста и зрелоста на ученикот, како и тоа дали мерката навистина може да има воспитен ефект и да доведе до промена во однесувањето.
По изрекувањето на казната, училиштата би имале обврска да го следат понатамошниот развој на ученикот и да обезбедат психолошка поддршка или советување.
Мерката нема да важи универзално за сите ученици. Таа би се применувала исклучиво за машки ученици во повисоките одделенија на основното образование и постари, додека за девојчињата се предвидуваат други видови дисциплински санкции, како задржување по часови, суспензија или промени во оценката за поведение. Ова ограничување се поврзува со постојните законски одредби во земјата кои не дозволуваат телесно казнување на жени.
Телесното казнување со стап не е непозната пракса во Сингапур. Потекнува од колонијалниот период и и денес се применува во судскиот систем за одредени кривични дела кај мажи, како што се тешки кражби, измами или прекршување на имиграциски правила.
Сепак, ваквиот пристап често наидува на критики од меѓународни организации. УНИЦЕФ и други тела за заштита на правата на децата предупредуваат дека физичкото казнување може да има долгорочни негативни последици врз психичкото здравје и однесувањето на децата.
Светската здравствена организација, пак, во своите последни анализи посочува дека ваквите практики сè уште се широко распространети глобално, со проценка дека над милијарда деца годишно се изложени на некаков вид физичка казна во домашни услови.
…
