Во Основниот кривичен суд во Скопје денес се очекува да биде соопштена пресудата против Стојанче Јовановски, кој се товари за повеќе кривични дела поврзани со семејно насилство, телесни повреди како продолжено дело, загрозување на сигурноста, како и за наведување и помагање во самоубиство. Случајот е поврзан со трагичниот настан од 2 март годинава, во кој животот го загубија неговата сопруга Ивана Јовановска и нивната шестгодишна ќерка Катја.
Во завршните излагања, Обвинителството побара најстрога казна, истакнувајќи дека доказите укажуваат на долг период на физичко, психичко и економско насилство врз оштетената. Според обвинителството, таквото однесување не било изолиран инцидент, туку континуиран образец на контрола и малтретирање кој, како што наведуваат, завршил со трагични последици.
Јавната обвинителка Адела Бојчевиќ посочи дека доказната постапка вклучува искази од членови на семејството, психијатриски наоди, медицинска документација, аудиоснимки и други материјални докази кои, според неа, даваат целосна слика за состојбата во семејството. Таа нагласи и дека вештачењето не утврдило постоење на душевно заболување кај обвинетиот што би ја намалило неговата одговорност, туку се опишуваат карактеристики како потреба за контрола, сомничавост и манипулативно однесување.
Обвинителството побара судот да изрече казна во законскиот максимум за сите три дела, со образложение дека само таква санкција би ја одразила тежината на случајот и би испратила порака за сериозноста на семејното насилство.
Од друга страна, одбраната на Јовановски целосно ги отфрли наводите од обвинението, оценувајќи дека доказите не се доволно цврсти и дека дел од исказите се посредни и недоволно поткрепени. Адвокатот Давор Ангелевски наведе дека не е јасно утврдено кој точно ги нанел повредите, ниту кога и на кој начин настанале, додавајќи дека не постои докажан причинско-последичен однос меѓу делата што му се ставаат на товар и настанатите последици.
Одбраната смета дека Обвинителството не успеало да ја докаже вината над разумно сомневање, поради што побара ослободителна пресуда за обвинетиот.
…
