Во Скопје попладнево се игра уште едно жестоко ракометно дерби, во кое Вардар и Еурофарм Пелистер повторно ги вкрстуваат копјата во натпревар што може сериозно да ја насочи шампионската трка во Суперлигата.
Дуелот од седмото коло во плеј-оф фазата доаѓа во момент кога Вардар е на чекор до враќање на титулата. Со предност од шест бодови пред Охрид и дури осум пред денешниот противник од Битола, црвено-црните се наоѓаат во многу поволна позиција, доволен им е само уште еден бод во преостанатите кола за математички да го потврдат првото место.
Сценариото за шампионска промоција речиси и не може да биде поидеално: домашен терен, публика зад нив и директен дуел со актуелниот бранител на титулата. СЦ „Јане Сандански“ повторно ќе биде сцена на голем ракометен судир, каде секој дуел носи тежина на финале.
Од другата страна, Пелистер пристигнува да го одложи славјето на ривалот и да ја задржи неизвесноста во трката, но и да ја одбрани честа во еден од најважните натпревари во сезоната.
…
