Заменик-претседателот на рускиот Совет за безбедност, Дмитриј Медведев, упати остри предупредувања во врска со можноста Германија во иднина да се приближи до нуклеарно вооружување, оценувајќи дека таков развој би претставувал директна закана и потенцијален повод за воен одговор од Москва.
Во објава за RT, Медведев предупреди дека таков развој би бил сфатен како „casus belli“, односно можен повод за воен одговор, при што нагласи дека Русија би реагирала со најшироки мерки предвидени во рамките на својата доктрина за нуклеарно одвраќање. Според него, последиците од вакво сценарио би ја надминале билатералната рамка и би се одразиле на глобалната безбедност.
Тој тврди дека дури и Соединетите Американски Држави би гледале со сериозна загриженост на ваквите поместувања, особено во контекст на идни разговори за нов договор за стратешко вооружување, познат како СТАРТ-4, како и можноста во тие процеси да се вклучи и Кина.
Во својата анализа, Медведев изнесува и предупредувања за можноста од создавање на „нуклеарна Европа“ под, како што ја нарекува, засилена германска воена улога. Според него, ваквата трансформација би можела да доведе до арсенал кој не би бил целосно под контрола на НАТО, што, како што вели, би отворило нови и непредвидливи ризици на глобално ниво.
Поранешниот руски претседател ја обвинува западната политика за систематско напуштање на меѓународните договори и принципи, тврдејќи дека ветувањата дадени во минатото, меѓу кои и оние поврзани со проширувањето на НАТО, биле заменети со прагматични политички интереси.
Во остар тон, тој ја критикува и актуелната германска политика, наведувајќи дека Берлин се движи кон стратегија која подразбира нанесување „стратешки пораз“ на Русија и силна поддршка за Украина. Медведев дури тврди дека украинската индустрија се користи како дел од германските економски интереси.
Дополнително, тој оценува дека германското раководство ја позиционира Русија како главна безбедносна закана во Европа, создавајќи, според него, атмосфера на долгорочна конфронтација.
Во завршниот дел од своите пораки, Медведев повикува Русија да остане во висока состојба на воена подготвеност на западната насока, повлекувајќи паралели со историските конфликти и предупредувајќи дека не смее да се дозволи повторување на трагични настани од минатото, како оние од 1941 година.
Тој заклучува дека какво било поместување кон германски нуклеарен капацитет или промена на европската безбедносна рамка без, како што тврди, соодветна контрола, би можело да предизвика реакција на Русија во согласност со нејзините стратешки одбранбени доктрини.
…
