Здравствените служби ширум светот се во засилена готовност по појава на серија случаи на хантавирус поврзани со крузерски брод што патувал низ повеќе региони. Според информации на Би-Би-Си, три лица починале, а уште четворица патници биле итно медицински евакуирани, што ја активирало една од најобемните операции за следење контакти во последниот период.
Бродот, кој превезувал патници од различни држави, сега е во центарот на меѓународна истрага. Здравствените власти од неколку земји, меѓу кои Велика Британија, САД, Канада, Јужна Африка, Холандија и Швајцарија, работат на лоцирање и следење на сите патници кои можеби биле изложени на вирусот, а веќе се вратиле дома.
И покрај загрижувачките информации, експертите нагласуваат дека ризикот за пошироката јавност останува низок. Од Светската здравствена организација беше потенцирано дека ситуацијата не укажува на почеток на нова глобална здравствена криза, ниту на развој на пандемија. Вирусот, според нив, не се пренесува со леснотија како респираторни инфекции како грип или мали сипаници.
Станува збор за ански сој на хантавирус, кој традиционално се поврзува со контакт со глодари. Инфекцијата најчесто се јавува кога луѓето вдишуваат честички од урина, измет или плунка од заразени животни. Во овој случај, сè уште не е утврдено како точно започнало ширењето на бродот, но се разгледува можноста патник да се заразил пред качување или за време на посета на изолирани природни области.
Дополнителна сложеност внесува фактот што вирусот, во ретки ситуации, може да се пренесува и меѓу луѓе при многу близок и продолжен контакт. Токму условите на крузерот: затворени простори, заеднички кабини и трпезарии, се сметаат за фактор што можеби го олеснил ширењето.
Меѓу починатите е и жена од Холандија, која се симнала од бродот на островот Света Елена. Таа претходно делела кабина со сопругот, кој исто така починал за време на патувањето, иако сè уште не е потврдено дали неговиот случај е директно поврзан со вирусот.
Симптомите кај заразените обично наликуваат на силен грип, со треска, замор и болки во мускулите, но во потешки случаи може да се појават и проблеми со дишењето, дигестивни тегоби и сериозно влошување на состојбата. Лек за специфично лекување не постои, па терапијата се базира на поддршка и навремена медицинска нега, која значително влијае врз исходот.
Паралелно со истрагата, здравствените власти ги следат сите патници и членови на екипажот кои биле на бродот. Дел од нив веќе се во изолација, а некои држави започнаа и со индивидуално следење на повратниците. Од британската Агенција за здравствена безбедност се наведува дека станува збор за сложена и долготрајна операција за контрола на можни контакти.
Во меѓувреме, останатите патници од бродот се пренасочуваат кон понатамошен транспорт и враќање во матичните земји, додека самиот брод е подложен на темелна дезинфекција. Според досегашните извештаи, кај преостанатите патници не се забележани симптоми на инфекција.
Иако случајот предизвика големо меѓународно внимание, надлежните институции повторуваат дека ситуацијата е под контрола и дека внимателното следење на контактите е клучно за спречување на понатамошно ширење.
…
