Руската државна телевизија „Русија 1“ објави список на потенцијални цели во Киев кои би можеле да бидат погодени во случај на, како што наведуваат, „провокација“ или прекин на парадата за Денот на победата што ќе се одржи на 9 мај во Москва.
Во телевизискиот прилог биле прикажани повеќе локации во центарот на украинската престолнина, меѓу кои владините институции, украинскиот парламент, безбедносни објекти, но и дипломатски претставништва на странски држави.
Според изнесеното во емисијата, во евентуален одмазднички удар би можел да биде опфатен целиот владин кварт во Киев, од Маринскиот парк до зградата на Кабинетот на министри. Како можни цели биле споменати и Врховната рада, седиштето на украинската служба СБУ, како и објекти во близина на амбасадите на повеќе земји.
Во извештајот било посочено дека во густо населениот дел Шевченко се наоѓаат дипломатски претставништва на десетици држави, вклучително и на САД, Германија, Франција, Италија, Полска и Канада.
Пропагандистот Константин Книрик, кој учествувал во прилогот, директно ја спомнал улицата Банкова во Киев, каде се наоѓа кабинетот на украинскиот претседател Володимир Зеленски, тврдејќи дека Русија има способност да погоди и бункери што ги користи украинското раководство.
Тој додал дека, според него, украинските власти сериозно ги сфаќаат руските предупредувања, посочувајќи на зголемен интерес за изнајмување станови во западниот дел на Украина.
Објавата доаѓа во период на засилени тензии меѓу Москва и Киев пред одбележувањето на 9 Мај, Денот на победата, кој традиционално се прославува со голема воена парада во руската престолнина.
…
