Драматични сцени се одвиваат во Грција по откривањето на беспилотен морски дрон во близина на островот Лефкада, кој според грчките медиуми бил натоварен со експлозив и опремен со три детонатори.
Црниот дрон бил пронајден во морска пештера кај Лефкада, а рибари први го забележале додека моторот сè уште работел. Тие го извлекле пловилото и го одвлекле до пристаништето Vasiliki Port, по што веднаш било предадено на грчкото Министерство за одбрана.
Според првичните информации, постои сомнеж дека станува збор за напреден украински морски дрон од типот MAGURA V3, кој се користи за специјални операции на море, извидување и напади врз бродови. Овој тип беспилотни пловила е познат по тоа што може да носи експлозивно полнење и да се користи во камиказе-напади.
Истражителите наведуваат дека дронот бил опремен со антени, сензори и напредна комуникациска опрема, што отвора повеќе сценарија за неговата намена. Една од можностите е негово користење за нелегални активности, како шверц, додека друга, посериозна хипотеза, е поврзаност со напади врз бродови во поширокиот регион.
Грчките медиуми потсетуваат дека во последните месеци биле регистрирани неколку сомнителни инциденти на море, вклучувајќи оштетувања на руски танкери и товарни бродови. Меѓу нив се споменуваат и случаи како нападот врз танкерот „Кендил“ во декември и експлозијата што оштети брод за течен природен гас во март кај Малта.
Сè уште не е познато од каде дошол дронот и како завршил во близина на Лефкада, а истрагата продолжува во повеќе правци, додека безбедносните служби внимателно ја анализираат неговата техничка опрема и можната намена.
…
