Петер Маѓар ја изненади унгарската јавност со изборот на нов министер за социјални и семејни прашања, назначувајќи го слепиот адвокат и аикидо мајстор Вилмош Катаи-Немет, кој стана првиот слеп министер во модерната историја на Унгарија.
Неговата животна приказна веќе предизвика огромно внимание во европската јавност, а многумина ја нарекуваат една од најинспиративните политички приказни во последните години.
Катаи-Немет го изгубил видот на само 16 години, додека бил средношколец.
Наместо да се повлече од јавниот живот, тој продолжил да се бори, успеал да дипломира на правен факултет и изградил успешна кариера како адвокат.
Но, она што најмногу ја фасцинира јавноста е неговата спортска приказна. И покрај слепилото, продолжил активно да тренира Аикидо и станал еден од ретките слепи аикидо мајстори во светот.
Според биографските податоци, тој стигнал до црн појас и развил сопствен систем за самоодбрана за лица со оштетен вид под името „Бел меч“.
Унгарските медиуми веќе го нарекуваат „човекот што го претворил слепилото во сила“, бидејќи аикидото важи за боречка вештина која бара исклучителна рамнотежа, ориентација во простор и чувство за движење.
Во политиката влегол релативно доцна, дури во 2024 година, кога му се приклучил на движењето ТИСА предводено од Петер Маѓар.
На последните избори освоил пратенички мандат во Будимпешта, по што бил избран за министер за социјални и семејни прашања.
Петер Маѓар изјави дека Катаи-Немет е вистинскиот човек за ресорот што ги опфаќа социјалната политика, пристапноста и еднаквите можности.
„Како лице со оштетен вид, тој од лично искуство ги знае проблемите со кои се соочуваат луѓето со попреченост“, изјавил Маѓар.
Катаи-Немет веќе е препознатлив и по својот специфичен црн хумор. Во едно интервју, зборувајќи за состојбите во државата, изјавил: „И слеп човек може да види дека Унгарија има проблеми“, реченица што денес масовно се споделува на социјалните мрежи.
Во неговата официјална биографија се наведува и дека е татко на две деца, а во политиката сака да покаже дека и од најтешките животни околности може да се изгради достоинствен и исполнет живот.
Назначувањето на Вилмош Катаи-Немет отвори дебата во Унгарија дали станува збор за симболичен политички потег или вистинска промена во односот кон лицата со попреченост, но едно е сигурно – неговата приказна веќе ја надмина политиката и стана симбол на човечка упорност и сила.
