Новата шефица на бугарската дипломатија, Весислава Петрова Чамова, која неодамна стапи на функцијата, уште во првите настапи предизвика реакции во Скопје поради начинот на кој ја именуваше државата во нејзина изјава за бугарските медиуми.
Наместо да се повика на вообичаената дипломатска терминологија, таа употреби формулација „северномакедонски“, што веднаш беше оценето како несоодветно и провокативно во македонската јавност.
На ваквиот настап реагираше министерот за надворешни работи на Македонија, Тимчо Муцунски, кој преку објава на Фејсбук јасно порача дека ваквата употреба на терминологија не соодветствува ниту на дипломатските стандарди, ниту на почитта кон идентитетот на еден народ. Тој нагласи дека Македонците се Македонци и дека тоа не е политичко прашање, туку основен принцип на достоинство и признавање.
Муцунски дополнително се осврна и на тврдењето на неговата бугарска колешка дека имале формална средба во Брисел за време на состанок на Советот за надворешни работи на Европската унија. Тој таквото толкување го отфрли, објаснувајќи дека станувало збор единствено за кус неформален разговор во присуство на повеќе дипломати.
Како што истакна, ако неколкуминутна размена на зборови може да се смета за „средба“, тогаш дипломатската агенда би била преполна со вакви настани. Сепак, додаде дека во краткиот разговор ѝ пренел надеж оти двете земји наскоро ќе имаат вистинска, официјална средба на повисоко ниво.
…
