Основното јавно обвинителство за гонење организиран криминал и корупција ја затвори истрагата за набавките на мазут за ТЕЦ Неготино, во која беа опфатени 13 лица, меѓу кои и бизнисменот Ратко Капушевски, сопственик на компанијата РКМ.
По повеќе од една година истражни проверки, обвинителството заклучило дека не постојат докази што потврдуваат дека осомничените ги сториле делата што им се ставале на товар, ниту пак дека е извршено друго кривично дело кое се гони по службена должност.
Сомнежите што ја отворија истрагата се однесуваа на можни злоупотреби во постапките за набавка на мазут во периодот на енергетската криза, вклучително и наводи за незаконско склучување договори, анекси и перење пари. Но, според Обвинителството, собраните докази упатуваат на поинаква слика.
Во нивното образложение се наведува дека постапките се одвивале во услови на прогласена енергетска криза од страна на Владата, при што биле применети законски исклучоци предвидени во Законот за јавни набавки. Целта, како што тврдат од ОЈО ГОКК, била обезбедување континуирано производство на електрична енергија.
Истражителите анализирале обемна документација: од договори и финансиски извештаи, до вештачења и сведочења на претставници од ЕСМ, ТЕЦ Неготино и компании со лиценци за трговија со мазут. Според нив, компаниите биле контактирани на транспарентен начин, а дел од нив одлучиле да не учествуваат поради деловни ризици, високи финансиски гаранции или состојбата на пазарот.
Обвинителството дополнително истакнува дека снабдувањето со мазут било континуирано и без прекини, што овозможило непречено производство на електрична енергија во период кога државата не се соочувала со рестрикции. Дури и повеќе, се нагласува дека електричната енергија произведена во ТЕЦ Неготино била поевтина од онаа на слободниот пазар.
Во однос на финансиските аспекти, истрагата не утврдила штета ниту за ЕСМ ниту за државниот буџет. Измените во плановите за јавни набавки и склучувањето анекси, според Обвинителството, биле донесени преку надлежните органи на компанијата и потврдени од управни и надзорни тела.
И сомнежите за перење пари се отфрлени. Според анализата на трансакциите, исплатите и движењето на средствата, тие не покажуваат елементи на прикривање незаконски стекнат имот.
И покрај затворањето на истрагата, случајот не е целосно завршен, оштетената страна има право да поднесе приговор до Вишото јавно обвинителство во Скопје во рок од осум дена.
Постапката започна по претходни полициски приведувања и отворање истрага против 13 лица за злоупотреба на службена положба и перење пари, а во јавноста дополнително внимание предизвикаа и податоците објавени од Истражувачката репортерска лабораторија, според кои компанијата РКМ во периодот на енергетската криза продала големи количини мазут за ТЕЦ Неготино во вредност од над сто милиони евра.
…
