Незадоволството на трибините на „Сантијаго Бернабеу“ очигледно сериозно влијае врз Килијан Мбапе. Според информациите на „Атлетик“, француската ѕвезда не сака повеќе да настапува пред домашната публика до крајот на сезоната, разочаран од реакциите што ги добива од навивачите на Реал Мадрид.
Наместо со голови, асистенции и лидерски настапи да ја смири атмосферата, Мбапе, според шпанските медиуми, тешко ги поднесува свирежите кои неколкупати одекнаа од трибините на „Бернабеу“. Тоа создало дополнителна тензија околу неговиот статус во клубот, особено во период кога од него се очекува да биде главен двигател на тимот.
Во Мадрид одамна важи непишаното правило дека најголемите фудбалски имиња мора да знаат да се носат со притисокот. Публиката знае да биде сурова, но истовремено бара пожртвуваност, карактер и одговорност на теренот. Токму затоа дел од критичарите сметаат дека реакцијата на Мбапе е показател за новата генерација фудбалери, играчи со огромен талент, но и со значително помала толеранција кон критики и притисок.
За разлика од легендите од претходните ери, кои често одговараа на свирежите со уште поголема борбеност и клучни партии, денешните суперѕвезди сè почесто дозволуваат атмосферата надвор од теренот да влијае врз нивната игра и однос кон клубот.
…
