Вистинска драма се одвивала на повеќе од 10.000 метри височина за време на лет на Qantas кон Далас, кога патник нападнал член на екипажот и наводно го каснал, по што останатите патници морале физички да интервенираат.
Инцидентот се случил во петокот на лет од Мелбурн кон САД, а поради проблематичното однесување на патникот авионот бил принуден итно да слета во Папете.
Според локалните медиуми, вклучувајќи ја и националната телевизија ABC, мажот станал агресивен за време на летот и каснал член на екипажот на авиокомпанијата.
Ситуацијата ескалирала до тој степен што дел од патниците морале да го совладаат и задржат сè до принудното слетување.
По слетувањето во Папете, патникот бил пречекан од локалните власти и приведен.
Од компанијата Qantas соопштија дека на мажот му е забрането понатамошно летање со сите авиони на компанијата.
„Безбедноста на патниците и екипажот е наш главен приоритет и имаме нулта толеранција за насилно и вознемирувачко однесување на нашите летови“, изјави портпарол на компанијата за AFP.
Инцидентот повторно ја отвори темата за сè почестите проблеми со агресивни патници во авионите, поради кои авиокомпаниите ширум светот воведуваат построги мерки и санкции.
