Грција влегува во летната туристичка сезона со целосно активиран биометриски систем за контрола на патници од земјите надвор од Европската Унија, а властите во Атина порачаа дека нема привилегирани држави и нема исклучоци за одредени туристи.
По шпекулациите дека британските патници би можеле да бидат ослободени од новите проверки поради очекуваниот метеж на аеродромите, грчкото Министерство за надворешни работи излезе со дециден став дека таква одлука не постои и дека не се разгледува никакво привремено олеснување за која било националност.
Во пракса, новиот режим значи дека класичните печати во пасошите заминуваат во историјата. Наместо тоа, патниците при влез во Грција ќе поминуваат низ дигитална идентификација со фотографирање и скенирање отпечатоци од прсти. Системот е во функција од 10 април годинава на аеродромите и копнените гранични премини низ земјата.
Сепак, властите оставаат простор за привремена „рачно управувана“ контрола во екстремни ситуации. На најоптоварените аеродроми, доколку се создадат долги колони и застои, скенерите ќе можат краткорочно да се исклучат за да се забрза движењето на патниците. Според грчките служби, ова е дозволено со европските правила во почетната фаза од примената на системот.
Граничната полиција најавува дека ова лето главен приоритет ќе биде избегнување хаос на терминалите и одржување стабилен проток на туристи, особено во шпицот на сезоната кога милиони посетители секојдневно пристигнуваат во земјата.
Причината за зголемената претпазливост е и туристичкиот бран што ја преплавува Грција. Само минатата година земјата ја посетиле рекордни 38 милиони туристи. Најмногу имало од Германија, речиси шест милиони, додека британските туристи биле веднаш зад нив со близу пет милиони посетители. Токму огромниот број патници ги зголемува стравувањата дека новите дигитални проверки би можеле да предизвикаат сериозни доцнења на граничните премини среде најинтензивниот дел од сезоната.
…
