Со заедничка иницијатива насочена кон зајакнување на правната сигурност на граѓаните и деловните субјекти, Комората на друштва за геодетски работи и Стопанска комора на Македонија започнуваат општествено-економска кампања чија цел е да се подигне јавната свест за значењето на уредувањето и заштитата на сопственичките права врз недвижен имот.
Кампањата носи наслов „Провери. Потврди. Поседувај. Твојот имот, твоја сигурност“ и е директно насочена кон сегашните и идните сопственици на недвижности, како граѓаните, така и правните лица. Главниот фокус е да се укаже на потребата имотот да се користи правилно и непречено, но и да се управува одговорно, особено во процесите на купопродажба, отуѓување и секојдневно располагање со него.
Од Стопанската комора информираат дека во рамки на најавата и промоцијата на кампањата ќе присуствуваат сите членови на Управниот одбор на Комората на друштва за геодетски работи, а пред присутните ќе се обрати и претседателот на Комората, Никола Рибароски.
Со оваа иницијатива се очекува да се поттикне поголема правна уреденост на имотните односи и да се зголеми свесноста кај јавноста за важноста од навремена проверка и потврда на сопственичките права како темел на сигурно располагање со недвижен имот.
…
