Основното јавно обвинителство Скопје поведе постапка против 49-годишен маж поради сомнение за сторено кривично дело – „Насилство врз дете“ согласно член 201-а од Кривичниот законик.
Според информациите од обвинителството, инцидентот се случил на 22 мај во дворот на основно училиште во Илинден, каде осомничениот извршил физичко и психичко насилство врз дете родено во 2013 година.
Според првичните информации, синот на осомничениот претходно имал недоразбирање со свој врсник, по што го повикал својот татко да дојде во училиштето.
По пристигнувањето во училишниот двор, осомничениот најпрво започнал да му упатува навреди, пцовки и погрдни зборови на детето, а потоа, според наводите, преминал и на физички напад.
Тој наводно му нанел повеќе удари со шлаканици и тупаници во пределот на главата и телото, при што детето се здобило со телесни повреди, меѓу кои расекотини и подливи.
По преземените дејствија, јавниот обвинител до судијата на претходна постапка доставил предлог за определување мерки на претпазливост за осомничениот.
Предложените мерки вклучуваат обврска редовно да се јавува во судот, како и забрана да се приближува или контактира со оштетеното дете.
Надлежните институции продолжуваат со постапката за целосно расчистување на случајот.
