Демократска Република Конго се соочува со сериозна здравствена криза откако бројот на сомнителни смртни случаи поврзани со ебола надмина 200, покажуваат најновите податоци објавени од Министерството за здравство на земјата.
Според официјалните информации, досега се регистрирани 867 сомнителни случаи на зараза, а 204 лица во три провинции најверојатно починале како последица од вирусот.
Бројките покажуваат раст на заразата во споредба со претходниот извештај на Светската здравствена организација (СЗО), објавен во петокот, кога беа пријавени 177 сомнителни смртни случаи од 750 заразени лица.
ДР Конго на 15 мај официјално прогласи епидемија на ебола предизвикана од сојот Бундибугио – вирус против кој во моментов не постои вакцина ниту специфичен третман. Според здравствените власти, стапката на смртност кај овој сој може да достигне и до 50 проценти.
Дополнителен проблем претставува ограничениот капацитет за тестирање. Во земјата моментално само неколку лаборатории вршат анализи за вирусот, додека главното жариште на заразата се наоѓа во оддалечен и тешко пристапен регион каде што дејствуваат и вооружени групи.
Во меѓувреме, бројот на лабораториски потврдени случаи достигнал 91, а официјално потврдените смртни случаи се искачиле на 10.
Здравствените власти предупредуваат и на можност од регионално ширење на вирусот. Директорот на Здравствената агенција на Африканската унија, Жан Касеја, изјави дека десет држави се изложени на потенцијален ризик од ширење на заразата.
Станува збор за Јужен Судан, Руанда, Кенија, Танзанија, Етиопија, Република Конго, Бурунди, Ангола, Централноафриканската Република и Замбија.
И покрај загрижувачките бројки, Светската здравствена организација оцени дека во моментов епидемијата претставува мал ризик на глобално ниво, но ситуацијата продолжува внимателно да се следи.
