Во 2026 година, возењето во Грција повеќе нема да биде исто. Новиот Закон за безбедност во сообраќајот воведува строги правила, повисоки казни и масовни контроли, а туристите се меѓу оние кои најчесто ќе бидат проверувани. Покрај добро познатите забрани за алкохол и телефон, сега на листата има и предмети и навики за кои многумина не ни претпоставуваат дека се казниви.
Една од најстрогите забрани се однесува на антирадарите и уредите што откриваат полициски камери. Доколку полицијата пронајде таков уред во автомобилот, казната може да достигне и до 2.000 евра, а возачката дозвола да биде одземена на 30 дена. Проблем можат да предизвикаат и некои GPS апликации што предупредуваат за радари, па се препорачува таа функција да биде исклучена.
Под строга контрола е и превезувањето гориво во канистри. Во Грција е забрането носење резервно гориво во багажникот или кабината на автомобилот, освен во специјално одобрени услови. Законот важи и за одредени предмети за самоодбрана – солзавец, електрошокери и одредени видови ножеви можат да бидат третирани како нелегално оружје.
Грчката полиција од ова лето ќе обрнува внимание и на начинот на кој возачите се облечени. Возење со влечки, апостолки, боси нозе или високи потпетици може да се смета за опасно управување со возило и да резултира со парична казна. Иако не постои директна забрана во законот, полицијата има право да санкционира доколку процени дека обувките ја намалуваат контролата врз возилото.
Посебно строги се правилата за пушење во автомобил. Ако во возилото има дете помладо од 12 години, пушењето е строго забрането за сите патници, вклучително и возачот. Казната достигнува до 1.500 евра, а во одредени случаи може привремено да биде одземена и возачката дозвола.
Забрането е и користење слушалки додека се вози, без разлика дали се жичени или безжични. Телефон смее да се користи исклучиво преку hands-free систем. Доколку возачот биде фатен со телефон во рака, следува казна од 350 евра и одземање на возачката дозвола од 30 до 60 дена.
Новиот закон воведува и пониски ограничувања на брзината. Во повеќето населени места со една сообраќајна лента, максималната дозволена брзина ќе биде 30 километри на час. Контролите ќе се вршат преку илјадници нови камери поставени низ државата.
За повторени прекршоци, казните стануваат уште построги. Ако возач трипати направи ист сериозен прекршок во рок од пет години, можно е трајно губење на возачката дозвола.
Покрај тоа, секој автомобил мора задолжително да има противпожарен апарат, безбедносен триаголник, комплет за прва помош и рефлектирачки елек. При полициска контрола, недостигот на некој од овие елементи исто така може да резултира со казна.
…
