Со детска едукативна тура и низа забавни активности за најмладите денеска започна програмата на 44. традиционално искачување на Титов Врв на Шар Планина, една од најпознатите и најмасовни планинарски манифестации во Македонија.
Настанот го организира Планинарскиот клуб „Љуботен“ од Тетово, а и годинава се очекува да привлече голем број љубители на планината од земјава и од регионот.
Главното искачување ќе се одржи на 31 мај, кога повеќе од илјада планинари ќе тргнат кон највисокиот врв на Шар Планина. Традиционално, маршрутата започнува од Попова Шапка и продолжува по познатата Вакуфска патека до Титов Врв.
Организаторите најавуваат дека и годинава манифестацијата ќе помине во духот на долгогодишната традиција, дружењето, спортот и љубовта кон природата, вредности кои со децении го прават овој настан препознатлив меѓу планинарите.
Покрај искачувањето, посетителите ќе имаат можност да уживаат и во дополнителни содржини. На Попова Шапка ќе биде организиран планински базар на кој ќе бидат претставени локални производи, традиционални ракотворби и автентични специјалитети од регионот.
Во програмата е предвидено и дружење со музичка програма, со што организаторите сакаат да создадат вистинска планинска атмосфера за сите учесници и гости.
Традиционалното искачување на Титов Врв е дел од официјалниот календар на Федерацијата на планинарски спортови на Македонија и претставува еден од најзначајните планинарски настани во државата, кој секоја година обединува рекреативци, искусни планинари и љубители на природата од целиот регион.
Со четири и пол децении традиција зад себе, оваа манифестација останува симбол на планинарскиот дух и едно од најзначајните собири на Шар Планина.
